Kvöldstund Norðfirðingafélagsins í Fella- og Hólakirkju.

Þann 20. desember 1974 féllu tvö snjóflóð í Neskaupstað, með þeim afleiðingum að atvinnulíf staðarins lamaðist og 12 einstaklingar létust.   Slíkir atburðir fara aldrei úr minni þeirra er voru í Neskaupstað þennan dag.

Þegar 30 ár voru liðin frá þessum atburðum þá stóð Norðfirðingafélagið í Reykjavík fyrir messu í Fella og Hólakirkju, þann 20. desember 2004.  Það var þétt setin kirkja og Sr. Svavar Stefánsson sem var lengi prestur í Neskaupstað fór með ákaflega fallega tölu.  Síðan hefur Norðfirðingafélagið staðið fyrir messu þann 20. desember og ávallt í Fella og Hólakirkju þar sem Sr. Svavar hefur farið með tölu.

Í dag eru 33 ár  síðan þessir hræðilegu atburðir gerðust og var ein slík bænastund haldin í dag.  Það mættu liðlega 40 manns.  Þetta var eins og alltaf falleg stund og alltaf stendur Sr. Svavar fyrir sínu og ríflega það.    Alltaf er gaman að hitta Norðfirðinga.  Fyrir suma af okkur burtfluttu er þessi stund að verða fastur liður í jólaundirbúningnum.

Foreldrar mínir komu með okkur í bænastundina í dag en faðir minn hefur verið í krabbameins meðferð.  Hann er allur að hressast og eftir þessa fallegu stund fórum við á veitingastað og fengum okkur snarl.  Það er sannarlega jákvæð breyting á hans líðan og vonandi heldur meðferðin áfram að gera honum gott.  Bætt líkamleg heilsa styrkir hann og gefur von um bætt lífsgæði.  Foreldrar  mínir fara svo austur á morgun. 

Hér er svo mynd af firðinum fagra, Norðfirði,  með teikningu af þeim Snjóflóðavörnum sem voru settar fyrir ofan Víðimýri.  

 

 

Athugasemdir

[SigrúnSveitó, 21.12.2007 kl. 09:05]

Ég held ég setji þetta strax inn á dagatalið fyrir næsta ár! Hef ekki heyrt um þessa messu fyrr.  Hljómar vel, sérstaklega þar sem sr. Svavar er presturinn.

Gott að heyra að pabba þínum líður vel, berðu þeim kveðju mína.

Fjörðurinn er fagur.  María systir skilur ekkert í mér að vilja ekki flytja til hennar í 740 Paradís, eins og hún segir

[Gísli Gíslason, 21.12.2007 kl. 11:28]

Við sem erum flutt njótum þeirra forréttinda að heimsækja förðinn!!   Norðfirðingafélagið gefur út dagatal, ættir að verða þér úti um það, þar kemur fram allar uppl um starfsemi félagsins.  Það er alltaf notalegt að hitta sveitungana, eða "flóttamannaliðið" eins og mitt fólk fyrir austan nefnir okkur sem erum á mölinni.

[Eyleif Ósk Gísladóttir, 21.12.2007 kl. 11:58]

Hæj hæj pabbi minn :) flott blogg hjá þér:) og pabbi veistu hver magga er? allavega hún er besta og hún er að koma til reykjavíkur  en sjáumst:D

[Gísli Gíslason, 21.12.2007 kl. 12:49]

Hæ elsku Eyleif mín.  Já Magga var vinkona þín sem flutti í Hveragerðis. Æðislegt að hún sé að koma í bæinn.  Vonandi hittist þið vinkonurnar.

[SigrúnSveitó, 21.12.2007 kl. 14:45]

hehe, já flóttamannalið, gott orð! 

Við vorum að ræða um aðkomufólk í vinnunni um daginn.  Maðurinn minn bjó um tíma í Vestmannaeyjum og þar tíðkaðist að tala um "aðkomupakkið", sem ein úr vinnunni staðfesti.  Skammstöfun; "AKP".  Ég man að heima á Nobbó (amk á Ormsstöðum) var talað um "útlendinga" þegar aðkomufólk átti í hlut.  Þegar maður spáir í hvað fólki finnst um útlendinga á Íslandi í dag þá er það kannski ekkert skrítið miðað við hvað AKP hefur verið litið hornauga víða hér áður fyrr...

En þetta var út-úr-dúr...  

Hvar get ég nálgast svona dagatal???  Ég reyndi að leita að Norðfirðingafélaginu á netinu en fann ekki.  Ég væri nú vel til í að skoða það nánar.  Alveg eins og að vera í íslendingafélaginu í Köben meðan við bjuggum í DK!!  

Jólaknús

[Gísli Gíslason, 21.12.2007 kl. 14:56]

Hæ, Já man að ég var spurður hvort ég væri AKPþegar ég kom til Eyja frá Noregi. Annars var gott að vera í Eyjum og gott fólk þar.

sendu tolvupóst á Hólmfríði Guðjóns, hún er í stjórn  [e-mail] hún skráir þig í félagið.

[SigrúnSveitó, 21.12.2007 kl. 17:23]

Ok, takk. Geri það.