Réttur barna til að þekkja líffræðilegan uppruna sinn.

Það er mikil réttarbót að foreldrar geti fengið egg eða sæði og eignast börn, en er ekki eðilegt að þessi börn fái að vita þegar þau eru orðin fullorðin hver sé hið líffræðilega foreldri?

Það er staðreynd að hver einstaklingur mótast af bæði erfðum og umhverfi.  Er það ekki vafasamt að löggjafinn setji lög sem gera það að verkum að einstaklingar muni aldrei vita uppruna sinn ?  Ég held að löggjafinn geti  hreinlega verið að brjóta Barnasáttmála sameinuðuþjóðanna með því að ætla um aldur og ævi að hylja þessi spor.

"2. gr.
1. Aðildarríki skulu virða og tryggja hverju barni innan lögsögu sinnar þau réttindi sem kveðið er á um í samningi þessum, án mismununar af nokkru tagi, án tillits til kynþáttar, litarháttar, kynferðis, tungu, trúarbragða, stjórnmálaskoðana eða annarra skoðana, uppruna með tilliti til þjóðernis, þjóðhátta eða félagslegrar stöðu, eigna, fötlunar, ætternis eða annarra aðstæðna þess eða foreldris þess eða lögráðamanns. "

Er ekki verið að mismuna börnum þegar sum börn fá aldrei að vita sinn líffræðilega uppruna?

"7. gr.
1. Barn skal skráð þegar eftir fæðingu, og á það frá fæðingu rétt til nafns, rétt til að öðlast ríkisfang, og eftir því sem unnt er rétt til að þekkja foreldra sína og njóta umönnunar þeirra.

8. gr.
1. Aðildarríki skuldbinda sig til að virða rétt barns til að viðhalda því sem auðkennir það sem einstakling, þar með töldu ríkisfangi sínu, nafni og fjölskyldutengslum eins og viðurkennt er með lögum, án ólögmætra afskipta.
2. Sé barn ólöglega svipt einhverju eða öllu því sem auðkennir það sem einstakling skulu aðildarríkin veita viðeigandi aðstoð og vernd í því skyni að bæta úr því sem fyrst."

Það að virða rétt barns til að viðhalda því sem auðkennir það sem einstakling.  Líffræðilegar erfðir auðkenna barnið frá vöggu til grafar. 

Ég held að það væri eðlilegt að tryggja í þessum lögum að þegar þessi einstaklingar eru lögráða þá eigi þeir að eiga rétt til að vita sinn líffræðilega uppruna án þess að eiga neinn rétt til erfða osfrv. 

Staðgöngumæðrun áfram til umræðu

Athugasemdir

[Kristinn (IP-tala skráð) 30.3.2010 kl. 10:02]

Um hvað ertu að tala hérna? Hvernig tengist þetta frétt um staðgöngumæðrun. Staðgöngumóðir gengur með frjóvgaðan fósturvísi frá verðandi kynforeldrum barnsins. Hugsanlega gætu verðandi foreldrar þó nýtt sér þau úrræði sem eru þegar til staðar í dag, þ.e. gjafasæði og gjafaegg. Þessi umræða um staðgöngumæðrun snýst þó fyrst og fremst um þá manneskju sem gengur með barnið og nauðsynlega umgjörð í kringum hana.

[Gísli Gíslason, 30.3.2010 kl. 11:32]

Eins og ég skil þetta þá getur staðgöngu mæðrun verið með gjafa sæði/eggi úr einstakling sem ekki er svo uppeldisforeldri barnsins.  Réttur slíks barns til að þekkja uppruna sinn virðist ekki vera til staðar, ekki heldur þegar það er orðið fullorðið. 

[Ingibjörg (IP-tala skráð) 30.3.2010 kl. 16:28]

Sæll Gísli,

 þú ert að misskilja hlutina svolítið, í þessu tilviki er verið að tala um staðgöngu móðir sem gengur með barn fyrir kynforeldrana þar sem móðirinn af einhverjum ástæðum getur ekki gengið með barnið, oftast vegna þess að hún nær ekki að halda fóstrinu nema í nokkrar vikur. Þetta hefur ekkert að gera með gjafasæði eða gjafa egg.

[Gísli Gíslason, 30.3.2010 kl. 16:55]

Miðað við umræðuna á Alþingi þá er þetta ekki endilega bundið við að staðgöngumóðir gangi með fyrir kynforeldra, heldur geti líka verið þar sem t.d. egg eða sæði úr þriðja aðila sé notað.  A.m.k. þá finnst mér eins og umræðan um rétt barnsins vanti oft í svona umræðu, og gildir þá einu um gjafa sæði eða staðgöngumæðrun.  Þegar það er sagt þá tel ég að við eigum að leyfa staðgöngmæðrun en við megum ekki gleyma rétti barnanna.