Vegtollar eru nauðsynlegir til að koma framkvæmdum af stað !

Enginn vill greiða óþarflega háa skatta né gjöld, eðlilega.  En nú er staðan sú að ríkisstjóður er tómur og það þarf að koma af stað framkvæmdum.  Einhvern veginn þarf að fjármagna það og þá eru a.m.k tvær meginleiðir til þess a) auka skatta í ríkissjóð eða b) setja vegtolla.   Í mínum huga er er eðlilegt að nota vegtolla til að fjármagna að hluta eða að öllu leiti ákveðnar gatna-, brúar-, eða gangnaframkvæmdir.  Með því að fjármagna í gegnum vegtolla þá er tryggt að fjármagnið fer í það sem það á að fara á meðan auknir skattar fara bara í stóra ríkissjóðinn, sem er bæði galtómur og hriplekur.   Með veggjöldum þá greiða líka þeir sem nota, sem er ákveðin sanngirni og með vegtollum er hægt að ráðast fyrr í framkvæmdir heldur en ef beðið er eftir að röðin komi að þeirri framkvæmd í göggunarröðinu hjá hinu opinbera.  

Það er góð reynsla af Hvalfjarðargöngunum enda er sú framkvæmd ákaflega arðbær.  Vegtollarnir hafa borgað alla þá framkvæmd en það má líka hugsa sér að við aðrar framkvæmdir þar sem umferð er ekki eins mikil, þá  borgi vegtollar hluta af framkvæmdarkostnaði. 

Ég bjó í hinu olíu ríka Noregi í ríflega 6 ár á níunda áratug síðustu aldar.  Þá var mikið verið að brúa firði, gera göng og aðrar vegaframkvæmdir.  Oftar en ekki voru gjaldtökuhlið og þótti ekki tiltöku mál enda sýnt að viðkomandi samgöngubót hefði komið mörgum árum seinna ef ekki hefði komið til vegtollur.    Ekkert er ókeypis, hvorki vegir eða salt í grautinn.   Ef menn vilja samgöngubætur þá kostar það.  Það er ekki hægt bara að krefja um að koma framkvæmdum af stað. Það verður að svara spurningunni hvernig það er fjármagnað.  Vegtollur er að mínu viti betri kostur en auknir skattar.  Það þarf að koma framkvæmdum af stað svo verktakar hafi verkefni og fólk fái vinnu.  Oft var þörf en nú er nauðsyn og ef það þarf vegtolla til þess, þá verður svo að vera.

Margir Suðurnesjamenn gegn vegtollum

Athugasemdir

[Þórður Sigurjónsson (IP-tala skráð) 14.1.2011 kl. 18:12]

Áður en umræðan um vegtolla fer á flug, hvernig væri að nota alla þá skatta sem koma af bensíni og olíu til vegagerðar. Á hverju ári tekur ríkið ca. 45 milljarða af eldsneytissölu í formi skatta, einungis 15 milljarðar fara í vegamál. Hvað verðu um það sem eftir stendur, heila 25 milljarða?? Sendiráðin, fínerí í kringum Alþingi eða ráðuneytin. Þessari spurningu verður að svara áður menn fara að ræða vegtolla. Svo megum við aldrei gleyma jafnræðisreglunni, hverjir eiga valkost með notkun vegtolla og hverjir ekki. Hér á Suðurnesjum, einkum eftir kreppu, skapast aðstæður þar við erum tilneydd að sækja höfuðborgina (t.d. heilbrigðisþjónusta). Stór hluti borgarbúa þyrftu einungis að nota vegtollanna í frístundum, fara í sumarbústaðinn eða ferðalagið. Það eru margar hliðar á þessu máli og því afar mikilvægt að ana ekki út í neitt án þess að hafa skoðað málið út frá öllum hliðum.

[Gísli Gíslason, 16.1.2011 kl. 14:43]

Verðuppbygging í vegtolla er nú gjarnan þannig byggð upp að þeir sem nota mikið fá líka mikinn afslátt sbr hvalfjarðargöng.

Sá skattur sem er í dag í eldsneyti er nýttur í ríkissjóð.  Ef hann yrði allur settur í vegaframkvæmdir þá þyrfti annað hvort að skera niður hjá hinu opinbera eða auka skatta til að fylla í það gat. Það er langbesta lausnin að auka vegatolla og þar geta hvorki suðurnesjamenn né landsbyggðin, né höfuðborgarbúar skorast undan.