Þingmenn sem voru á Alþingi 2008 eru vanhæfir til að fjalla ...

23.9.2010 | 09:16

Þingmenn sem voru á Alþingi 2008 eru vanhæfir til að fjalla um Landsdóm !

Nú er til umfjöllunar á þingi hvort það eigi að það eigi að setja á fót Landsdóm og stefna 4 fyrrverandi ráðherrum til saka vegna meintrar vanrækslu í aðdraganda efnahagshrunsins.  Að stefna þessum ráðherrum þýðir ekki að þingið hafi tekið afstöðu til sektar eða sýknu, heldur að hér geti verið um sekt að ræða og því sé nauðsynlegt að fá úr því skorið hvort þessir fyrrverandi ráðherrar hafi gerst sekir við þau lagaákvæði sem svokölluð Atlanefnd rannsakaði.

Nú sýnist mér að þeir þingmenn sem tengjast þessum ráðherrum vinaböndum og voru nánir samstarfsmenn þeirra eru frekar á móti því að þeir séu ákærðir.  Mér sýnist þetta oftar en ekki vera þingmenn sem sátu á þingi með þessum ráðherrum árið 2008.   Ég skil vel að það er erfitt að stefna vinnufélugum og jafnvel vinum sínum fyrir dóm.

Í mínum huga er alveg klárt að þeir þingmenn sem sátu á þingi 2008 eru vanhæfir til að fjalla um þetta mál. Skiptir þá engu máli hvort þingmaðurinn heitir, Bjarni Benediktsson, Jóhanna Sigurðardóttir eða Steingrímur J. Sigfússon.   Til þess eru þessi þingmenn of tengdir bæði þeim 4 ráðherrum sem um ræðir og tengdir þeim atburðum sem verið er að fjalla um.

Það eru mörg dæmi í sögulegu samhengi þar sem ósanngjarnt uppgjör í samtímanum hefur áhrif í framtíðinni. Því er mikilvægt að þingið klári þetta mál þannig að sómi sé af og afgreiðslan verði þannig að hún standist söguskoðun framtíðarinnar. Til þess ættu þeir þingmenn sem sátu á þingi 2008 að kalla inn varamenn og láta þá fjalla um þetta mál og afgreiða.