Mikilvægt mál.

Upphaflega ráku umhverfisverndarsamtök þann áróður að það þyrfti bjarga hvölum frá útrýmingu.  Í dag snýst þetta um eitthvað allt annað, s.s að hvalir séu svo gáfaðir að ekki megi drepa þá og að hvalir eigi bara að fá að vera í friði í höfunum og höfin eigi að vera griðland þeirra go jafnvel að það sé svo erfitt að hafa stjórn á veiðum að betra sé að sleppa því að veiða osfrv.  Auðvitað er þetta allt rökleysa, en þetta eru ríkjandi viðhorf víða erlendis. 

Meinsemdin í þessu öllu er einmitt að almenningsálitið úti í heimi er á móti hvalveiðum.  Til að koma veiðum á og til að skapa sátt um það þá þarf að breyta almenningsálitinum sem umhverfissamtök hafa fóðrað í áratugi á röngum upplýsingum og þ.a.l. byggir almennningur erlendis sínar skoðanir á röngum forsendum.  Það er ljóst að íslensk stjórnvöld og hagsmunasamtök hér á landi hafa staðið sig illa í að kynna og verja málstað hvalveiða.   Maður spyr af hverju er ekki kynningar bæklingar um hvalveiðar, (Factsheet) í Flugstöð Leifs Eiríkssonar fyrir ferðamenn sem koma til landsins? Af hverju birtast ekki heilsíðu auglýsingar í erlendum blöðum um staðreyndir um hvalveiðar ?  Af hverju heyrir maður ekkert um vinnu íslenskra sendiráða í að kynna málsstað hvalveiða erlendis ?   Hvað er gert til að kynna málstað hvalveiða erlendis??

Það eru einföld og efnisleg rök fyrir því að við eigum að nýta hvalstofna eins og aðrar auðlindir. Til þess þarf að breyta almenningsáliti erlendis og það kostar skipulagða vinnu.  Stjórnvöld og hagmunaaðilar þurfa að hafa virk samskipti við náttúruverndarsamtök erlendis, nokkuð sem gæti breytt þeirra skoðun á hvalveiðum sem yrði mikilvægt skref. Slík vinna er ekki í gangi og hefur ekki verið.  Það virðist lítið sem ekkert vera í gangi annað en að íslenskir fulltrúar fara á þing Alþjóðahvalveiðiráðsins og þar virðist lítið gerast. 

Hvalir eru hluti af auðlindum hafsins og ber að nýta á sjálfbæran hátt eins og aðrar auðlindir hafsins.  Til þess þarf að skapa sátt um veiðarnar og því miður er langt í land með að það náist og þar stendur uppá stjórnvöld og hagsmunaaðila í sjávarútvegi.

Segir að taka verði ákvarðanir í hvalamálum

Athugasemdir

[Sveinn Ingi Lýðsson, 20.1.2009 kl. 13:48]

Að sjálfsögðu eigum við að nýta gjafir náttúrunnar af hófsemi, kostgæfni og virðingu.  Samt er það nú þannig að mannskepnan flokkar dýr í "góð", "vond" og svo er það svínakjöt og kjúklingar.  Tilfinningasemin lætur ekki að sér hæða. Malbiksbörnin í stórborgunum hafa einhverra hluta ákveðið að hvalir séu "góð" dýr, óskaplega falleg, gáfuð og örugglega í útrýmingarhættu!

Þessa tilfinningasemi getum við auðveldlega heimfært upp á okkur sjálf.  Hver man ekki ekki hinu árlega rjúpnaþrasi þingmanna, allt verður vitlaust þegar einhver dirfist að nefna þann ósóma að nýta dýrastofna eins og heiðlóur, hrossagauka svo eitthvað sé nefnt.  Í nytjum þessara stofna eru talsverð verðmæti í formi sportveiða og öðru sem því er tengt.  Nei þetta má ekki, nei alls ekki blessaða lóuna því hún er svo sæt og góð.

Mér er minnistæð grein Halldórs Blöndal sem vildi friða endur á þessum sömu forsendum, þetta væru svo vænir og góðir fuglar.  Þar sem téður Halldór var eindreginn fylgismaður hvalveiða, tók ég mig til og skipti út orðinu önd og setti hvalur í staðinn.  Bara svona til að minna á tvískinnunginn í okkur sjálfum.

Mín skoðun er sú að hvalir skulu veiddir og nytjaðir eins og önnur dýr.  Ekkert flókið en við verðum að vera sjálfum okkur samkvæm.

Alltaf.

[Gísli Gíslason, 20.1.2009 kl. 16:12]

Þetta er skemmtileg samlíking.  Ekki ósvipað dæmi.  Einu sinni setti ég athugasemd á blogsíðu hjá einum feminista.  Hún talaði um karla með þeim hætti að ekki er sæmandi og benti henni á að ef maður tæki orðið karl út en setti orðið svertingi ístaðinn þá væri þetta alvarlegur rasismi.  Henni fannst í góðu lagi að skrifa svona um karla en hefði verið slæmt að skrifa svoleiðis um litað fólk.  Þetta má lesa hér: http://soley.blog.is/blog/soley/entry/350629/ 

Oft þarf einfalda samlíkingu til að benda á fáránleika eða tvískinnung í málflutningi.

[Hulda Elma Guðmundsdóttir, 21.1.2009 kl. 23:32]

Ég er náttúruverndar- og friðarsinni en ég vil að við nýtum auðlindir okkar. Þetta dæmi um úthrópanir á hvalveiðum er eins og þegar Bardot vildi banna fólki að klæðast loðfeldum Dj... vitleysa.