Að mjólka nytin úr kúnni !

Við  Íslendingar höfum búið  við gott tekjuskattskerfi, þar sem að ein skattaprósenta gildir fyrir  alla og allir hafa persónuafslátt.  Það þýðir það að fólk með lágar tekjur greiðir mun minni skatt hlutfallslega af launum sínum heldur en fólk með hærri tekjur.  Kerfið er einfalt, skilvirkt og tryggir það að þeir með hærri laun greiða meiri skatta hlutfallslega en þeir með lægri laun. 

Nú þarf að auka tekjur ríkissjóðs.   Eðlilegasta ráðstöfunin hefði verið að ráðast  gegn atvinnuleysinu en þar berst ríkisstjórnin af fullum þunga gegn uppbyggingu á bæði á Bakka og í Helguvík og kemur með afgerandi hætti í veg fyrir að búin verði til  ný störf.  Á meðan eru þúsundir einstaklinga atvinnulausir sem ekki greiða neina skatta en þyggja atvinnuleysisbætur.   Að virkja þennan hóp í atvinnulífið væri besta og skilvirkasta ráðstöfunin til að auka tekjur í ríkisskassann.  Nei það má ekki því nú er orðið bannorð að virkja og bannorð að leggja rafmagnslínur um landið okkar og því verða þúsundir Íslendinga áfram atvinnulausir.

Lausnin hjá  ríkisstjórninn er að henda núverandi kerfi og taka upp þrepaskipt skattkerfi og skattleggja þyngra þá með hærri laun.  Ef ríkisstjórnin vildi auka álögur á þá  tekjumeiri þá hefði verið mun eðlilegra og  einfaldara í framkvmd hækka skattaprósentuna, eða bara bæta við hátekjuskatti eins og var um árið.  Slík breyting hefði ekki kostað jafn umfangsmikla vinnu vegna kerfisbreytingar hjá bæði Alþingismönnum og embættismönnum.  Sú vinna hefði verið betur nýtt  í margt annað.

Það er margsannað ef skattaálögur aukast yfir eitthvað ákveðið stig, þá eykur það ekki skattekjurnar.  Í heimi hagræðinnar er þetta kennt við Laffer.   Á einfaldri íslensku heitir það að mjólka nytin úr kúnni, þ.e. ef kusa er  mjólkuð of hart þá minnkar það sem hún gefur af mjólk og í versta falli hætt að mjólka.  Það er vonandi að ríkisstjórnin mjólki ekki nytin úr íslensku samfélagi.

Skattafrumvörp til nefndar

Athugasemdir

[Eysteinn Þór Kristinsson, 9.12.2009 kl. 10:33]

Sæll félagi Gísli. Í minni stærðfræði er það svo að allir greiði jafnmikið hlutfallslega af skattskyldum tekjum ( það er því sem er umfram persónuafsláttinn) þegar sama skattprósentan er. Sá sem er með 250000 greiðir jafnmikið af því sem er umfram persónuafsláttinn og sá sem er með 2500000. Mér finnst ekker óeðlilegt að fólk sem er með meira en milljón á mánuði greiði aukna prósentu af því sem er umfram milljónina. Ekki miða hlutfallið við heildarlaunin heldur skattskyldu launin. Kveðjur á Álftanesið

[Gísli Gíslason, 12.12.2009 kl. 16:33]

Sæll félagi. 

Í mínum huga er eðlilegra að horfa á heildarskattgreiðsluna sem  hlutfall af launum og þá er hún breytileg.   Þannig borgar maður með 400 þús mánaðarlaun meiri tekjuskatt en maður með 300 þús í laun og maður með 600 þús greiðir meiri skatt en maður með 400 þús í laun osfrv.

Kerfið er einfalt og hefur virkað vel.  Ef menn vilja taka upp auknar álögur á þessa allra hæstu þá væri einfaldast að taka upp gamla hátekjuskattinn og láta grunnkerfið halda sér. 

En það er ekkert að því að hafa aðrar skoðanir.