Þakkir !

Nú þegar vika er liðin frá brúðkaupinu, þá viljum við þakka öllum kærlega fyrir okkur.  Við þökkum Jónu Hrönn fyrir frábæra athöfn í kirkjunni. Guðmundi Rafnkel og Hlöðveri Smára fyrir frábæra músík bæði í  kirkjunni og í veislunni.  Grétar sömuleiðis fyrir frábæra harmónikkutónlist í veislunni.  Baldri þökkum við frábæra veislustjórn og  Heimi Berg og Sólrúnu fyrir að vera okkar einkabílsstjórar þennan dag.  Ingólfi Rafni og Dagrúnu  þökkum við fyrir  að standa vaktina og taka vel yfir 400 myndir af þessu öllu saman og færa okkur svo í svo fallegu umslagi og vel frágengnu.  Sveinu og Geir þökkum við fyrir að lána okkur bústaðinn sinn.  Maturinn frá Kokkarnir.is var frábær og diskótekið Dísa hélt uppi miklu stuði eftir borðhald. Svo að lokum þökkum við öllum þeim sem glöddu okkur með nærveru sinni og hlýhug þennan dag sem og þeim er sendu okkur gjafir og heillaóskir í tilefni dagsins. 

Svo erum við alltaf að bæta inn nýjum myndum í albúmið Brúðkaup.

 kveðja

Bergrós og Gísli

Brúðkaupið þann 25.ágúst

Við hjónaleysin gengum upp að altarinu þann 25. ágúst sl.   Athöfnin hófst kl. 14.00 í Bessastaðakirkju.  Börnin gengu á undan okkur inn kirkjugólfið.  Það var gaman hve margir samglöddust okkur bæði í kirkjunni og í veislunni á eftir. Veislan á eftir var í sal í Íþróttahúsinu á Álftanesi.  Allt var þetta dásamlegur dagur og kvöld og svo enduðum við í sumarbústað í Grímsnesinu sem Sveina og Geir voru svo elskuleg að lána okkur.  Hér að neðan  eru nokkrar myndir en fleiri má skoða í skoða myndaalbúm hér að neðan sjá Brúðkaup.  Stórkostlegur dagur !!!

 

Sameiginleg forsjá í sama hverfi er best.

Það er staðreynd að börn sem alast upp án föðurs eða aðeins hjá einu foreldri er mun hættara við að lenda afvega í lífinu.   Rannsóknir sýna að þar sem að börn hafa áfram ríkt samband við báða foreldra þá minnka líkurnar á að barn lendi af sporinu. Það er áætlað að um 1 af hverjum 5  skilnaðarbörnum lendi afvega í lífinu.  Í bókinni "Skilsmissa börn berättar" eða "Skilnaðarbörn segja frá" frá árinu 2002 fjalla sænsku Öberg-hjónin, Bente og Gunnar um afdrif barna sem höfðu jafna búsetu hjá foreldrum eftir skilnað foreldra.   Rannsóknin stóð í yfir  20 ár. Niðurstaðan varð sláandi. Einungis eitt af þeim 50 börnum, sem fylgst var með, hafði lent illa afvega í lífinu. Fimm aðrir höfðu tímabundið lent í minniháttar vandamálum, en voru öll fjölskyldufólk í góðri stöðu við lok rannsóknarinnar. Ályktun Öberg-hjónanna var skýr eftir þessa rannsókn: Látum búsetu barna vera sem jafnasta hjá báðum foreldrum eftir skilnað.  Öberg-hjónin bentu á að í slíku fyrirkomulagi hafi allir áfram hlutverk, hvorugt foreldrið er tapari í skilnaðinum og börnin njóta áfram ríkra samvista við báða foreldra. En báðir foreldrar hafa einnig ríkan tíma til byggja upp sitt eigið líf.  Þannig eru foreldrarnir betur á sig komin að takast á við foreldrahlutverkið þá viku  sem barnið er hjá þeim.  Mikilvægt er að foreldrar búi í sama hverfi og að samkomulag sé gott. Raunar sýna rannsóknir að í slíku fyrirkomulagi hjaðna fyrr skilnaðardeilur foreldra. Langflestum  í úrtaki Öberg hjónanna fannst þetta gott fyrirkomulag og myndu einnig vilja slíkt fyrirkomulag fyrir sín börn ef þau lentu í skilnaði við sinn maka.   Margar aðrar rannsóknir styðja niðurstöðu Öberg hjónanna.   Foreldrajafnrétti eru því bestu hagsmunir barnanna og besta forvörnin, einnig  eftir skilnað foreldranna.

 Sameiginleg forsjá snýst um það að foreldrar slái skjaldborg um hagsmuni barnanna og hluti af því hlýtur að vera að stuðla að því að barnið sé í sama hverfi hjá báðum foreldrum, eigi sömu vini osfrv.   Rannsóknir sýna að það eru bestu hagsmunir barna.

 

Ganga í tvo skóla vegna skilnaðar

Gifting um næstu helgi

Það er óneitanlega mjög stór stund í lífinu, þegar  gengið er að altarinu og það gerist hjá okkur Bergrósu um næstu helgi, þann 25.ágúst n.k.  Þannig verður í nógu að snúast í vikunni og gaman að hitta vini og vandamenn.

Réttindabarátta feðra erlendis.

Það eru miklar tilfinningar sem brjótast út hjá mönnum þegar föðurhlutverk þeirra er gengisfellt eins og gjarnan gerist við skilnað.  Fréttir af baráttu feðra erlendis rata sjaldan í fréttir hérlendis, þó margar fréttir séu dauðans alvara eins og þessi.  Trúlega er frægasta frétt af baráttu feðra, þegar menn klifruðu  uppá Buckinghamhöll í búningi Batmann sem má sjá hér.    Ég vildi gjarnan deila með lesendum youtube og öðrum fréttaskotum sem ég hef fengið.  Sérstaklega finnst mér viðtalið við Bob Geldof (nr.1) sem lýsir ágætlega stöðu margra feðra.

1. http://jurlex-ouderschap-nl.blogspot.com/2006/10/96.html
2. http://uk.youtube.com/view_play_list?p=6DFFF15243FFC792
3. http://www.youtube.com/profile?user=evenToddlers
4. http://www.youtube.com/watch?v=Je4TZdMUihA
5. http://www.youtube.com/watch?v=2D5w2qfB6bo
6. http://www.bbc.co.uk/radio4/hometruths/20031004_fathers_access.shtml
7. http://www.bbc.co.uk/radio4/hometruths/ram/20031004_fathers_access.ram
8. http://www.middevonstar.co.uk/display.var.1087352.0.named_and_shamed.php
9. http://www.bbc.co.uk/radio/aod/networks/wales/aod.shtml?wales/richardevans_wed
10. http://www.youtube.com/watch?v=6e1KjS6Hx8k

 

Jafnrétti er gagnvirkur ferill.

Karita Bekkemellen hefur skilið fyrir löngu að til að konur nái jafnrétti á vinnumarkaði, þá þarf að jafna foreldraábyrgð kynjanna. Hún hefur því lagt til að ekki bara sameiginleg forsjá verði meginregla við skilnað foreldra heldur sameiginleg forsjá og jöfn foreldraábyrgð verði meginregla.  Einfaldlega vegna þess að barn á tvo foreldra sem eiga að bera jafna ábyrgð á uppeldi barna sinna, óháð hjúskaparstöðu foreldranna.   Barn á rétt  tveim jafnréttháum heimilum hjá bæði pabba og mömmu, þegar foreldrarnir búa ekki saman.  Karita er sjálf 42 ára einstæð móðir tveggja barna.

Félag ábyrgra feðra hefur ítrekað bent á að Karita Bekkemellen skoðar jafnréttismál út frá hagsmunum beggja kynja.  Um það má lesa  hér.  Hún hefur skynjað fyrir löngu að réttindabarátta karla verður að vera virkur hluti af jafnréttisumræðunni.

Karita Bekkemellen hefur einnig bent á að það þarf að jafna rétt foreldra til fæðingarorlofs. Um það má lesa hér .  Þetta er hluti af þeirri hugsun að jafna beri foreldraábyrgð í uppeldi barna.

Karita Bekkemellen hefur einnig dreift barnasáttmála Sameinuðuþjóðanna til allra grunnskólabarna í Noregi og kynnt þeim þannig rétt sinn. Um það má lesa hér.  Börn í Noregi læra því að báðir foreldra eiga að bera jafna ábyrgð á uppeldi barna sinna.

Hér á landi er jafnréttismál umræða kvennréttindamál, launajafnrétti og kvennfrelsi. Umræðan er einhliða  sem stillir konum beint og óbeint upp sem fórnarlömbum karla.  Það er lítið sem ekkert fjallað um réttindamál karla og hvernig jafnréttismál er gagnvirkur ferill.   Og karlar hafa verið alltof feimnir að fjalla um þessi mál.   Þannig er jafnréttis umræða hér á landi búin að vera í blindgötu í mörg ár

Það er full ástæða að óska Norðmönnum til hamingju með að þess nýju nefnd.  Jafnframt er full ástæða að hvetja íslenska ráðamenn til að taka svipuð skref hér á landi.

Karlar ræði „karlréttindamál“

Fagra Austurland.

Þá er Neistaflug í Neskaupstað á enda runnið.   Það eru nokkur atriði sem mér finnst standa uppúr á Neistaflugi.

1. Hér skemmta sér allar kynslóðir saman og skemmtidagskráin er fjölbreytt.
2. Á dagskránni yfir daginn sést varla vín á nokkrum manni en svo eru böll á kvöldin, bæði unglinga- og fulllorðinsböll.
3. Burtfluttir Norðfirðingar eru duglegir að mæta.
4. Ungir austfirðingar mæta og halda sig á tjaldsvæðinu á daginn og skemmta sér á kvöldin.
5. Fólk komið á húsbílaaldurinn mætir og má sjá húsbíla og fellihýsi um allan bæ.
6. Gunni og Felix eru sér kapituli útaf fyrir sig á þessari hátíð. Þeir eru límið í dagskránni og setja alltaf skemmtilegan svip á hátíðina.  Alltaf bráðskemmtilegir og glaðir á sviðinu.
7. Neistaflugslagið er hægt að mæla með, en það má hlusta á það hér

Tími hinna gömlu útihátíða er liðinn.  Hátíðir eins og Húnaver, Atlavík og Galtalækur eru horfnar en þær voru yfirleitt samkomur unglinga. 

Í dag eru bæjarhátíðir nánast allt sumarið úti á landi, eins og danskir dagar, írskir dagar, bryggjuhátíðir og humarhátíð, svo eitthvað sé nefnt.  Þessar hátíðir hafa tekið yfir hinar hefðbundnu útihátíðir.   Öfugt við gömlu útihátíðirnar, þá skemmta allar kynslóðir sér saman bæjarhátíðunum og er það jákvæð þróun. 

Fréttamennskan af hátíðum er alltaf sér kapituli útaf fyrir sig.   Góðar athugasemdir við fréttamennskuna af Neistaflugi má lesa hér

Drottning allra hátíða er Þjóðhátíð í Eyjum.  Engin samkoma hefur jafn langa hefð og djúpar rætur.   Sú hátíð er einnig einskonar blanda af útihátíð og bæjarhátíð. Eyjamenn skemmta sér í dalnum á daginn og fara svo heim til sín á nóttunni.   Þjóðhátíð í  Eyjum lifir hvort sem annarsstaðar á landiu eru haldnar útihátíðir eða bæjarhátíðir.

Það er gott og gagnlegt að ungir og aldnir skemmti sér og njóti sumarsins.

 

Mikið að gera hjá Kalla !

Þegar maður les svona fréttir þá getur maður ekki annað en brosað.  Fólk sem lendir í hamförum fær þann heiður að fá heimsókn  krónprinsins í Englandi.   Maður spyr er ekki svona kerfi með kóngafólki löngu orðið úrelt  ??  Blessaður Kalli fæðist sem prins og hefur aldrei haft neitt val um  hvað hann vill verða. Hann bara fæðist sem prins og á að verða konungur Englands þegar móðir hans deyr.  Og hans hlutskipti er að fjölmiðlar fylgja honum hvert fótmál.  Mér finnst eins  og svona menn fæðast ófrjálsir í hálfgerðu fangelsi fjölmiðla og búa við það alla ævi.

Karl Bretaprins heimsækir flóðasvæðin

Gummi bróðir gefur út geisladisk !

  Gummi bróðir er að gefa út sinn fyrsta sólo geilsadisk.  Hann hefur áður  gefið út þó nokkrar plötur með hljómsveitinni SúEllen sem  hann hefur verið söngvari í síðan hann var mjög ungur.  Ég held  að hljómsveitin hafi verið stofnuð 1983 þegar Gummi var 13 ára.    

Gummi kom áðan og gaf "bróa"  áritað eintak.  Hann áætlar svo að halda útgáfutónleika um verslunarmannahelgina á Neistaflugi í Neskaupstað og svo trúlega aðra tónleika hér sunnanlands með Dúkkulísunum, snemma í haust.   Lög af disknum má finna á blog síðu Gumma.  Ég er nú enginn sérfræðingur í hljómlist og fráleitt hlutlaus, en mér finnst þessi diskur  ákaflega einlægur og skemmtilegur.   Mikill Gummi í þessum disk. 

Bæði SúEllen og Dúkkulísurnar eru stofnaðar snemma á níundaáratugnum þegar sápuóperan Dallas var vikulega í Ríkissjónvarpinu.   Hljómsveitin SúEllen fékk nafn sitt frá hinni ógæfusömu eiginkonu J.R..  Dúkkúlísurnar sungu, "Ég vildi ég væri Pamela í Dallas".   Bobby og Pamela voru fyrirmyndarhjón í þáttaröðinni  öfugt við J.R. og Sue Ellen.  Þannig eiga báðar þessar frægustu  hljómsveitir Austurlands nokkrar rætur í sápuóperum sjónvarpsins, þegar hljómsveitarmeðlimir voru að stíga sín fyrstu spor í músíkinni.   Ég fór suður í skóla 1982 og aldrei búið fyrir   austan eftir að maður  hleypti heimdraganum.    Þannig hefur maður fylgst með úr fjarlægð.   Set svo hér að lokum mynd af Gumma með þeim Bjartmari og Bjarna Tryggva en myndin var tekinn í fyrra í 40 ára  afmæli, mágkonu minnar hennar Gunnu Smára.

 

TIL HAMINGJU GUMMI !!!!

Feministar og jafnrétti

Í greininni Vinnur Feministafélag Íslands gegn jafnrétti  er velt fyrir sér hvort jafnréttisbaráttan snúist á köflum of mikið um "konur á móti körlum" og segir í niðurlagi.   "Við stelpur eigum að hætta að líta á karla sem óvininn og fá þá í lið með okkur í jafnréttisbaráttunni. Þeir eiga nú flestir mæður, konur og dætur sem þeir vilja ekki að búi við óréttlæti. "  Mikið get ég tekið undir þetta sjónarmið en hér eins og oft í málflutningi feminista gleymist að geta þess að fullt af körlum býr við óréttlæti, og óréttlæti af hendi kvenna.  Hér eins og alltaf eru feministar  að horfa á  aðra hlið á  jafnréttismálum, þ.e. bara hlið kvenna og fá þ.a.l ekki heildarmyndina. 

Mig langar að nefna nokkur mál sem eru jafnréttismál en ekki er fjallað um:

• Stærsti kynbundni munur á kynjunum í dag er munur í heimilis og uppeldisábyrgð og þetta verður sérstaklega skýrt þegar kynforeldrar búa ekki saman.  Um þessi mál   fjalla ekki feministar (a.m.k ekki mikið) en fjalla þeim mun meir um launamun kynjanna sem er endurspeglun af kynbundum mun í heimilis og foreldraábyrgð.
• Konur eru trúlega í meirihluta gerenda í ofbeldi gegn  börnum.  Þetta má m.a. lesa í bókinni, Heimilisofbeldi gegn börnum á  Íslandi e. Jónínu Einarsdóttir, Sesselju Th. Ólafsdóttir, og Geir Gunnlaugsson frá  2004. Bókin er gefin út af Umboðsmanni barna  og Miðstöð heilsuverndar fyrir börn.  Í bókinni kemur fram  á bls 39 “Niðurstöður Freydísar Jónu(2003a) benda  til þess að mæður beiti börn sín oftar ofbeldi en feður”    Um þetta fjalla feminstar ekki en þeim mun meira um ofbeldi þar sem að karlar eru gerendur.
• Ég vil benda á vísindagreinasafn sem fjallar um að konur eru minnst jafn ofbeldisfullar  og  karlar.  Framsetning á ofbeldi hér á landi  og í Skandinavíu er  að karlar séu gerendur í 80-90% af öllu ofbeldi.  Þetta er trúlega fjarri öllu sanni.  Skv rannsóknum eru oftast báðir aðilar ofbeldisfullir, þegar ofbeldi er í parasamböndum. Um það má lesa hér.   Um þetta er ekki fjallað, hvorki af feministum né öðrum.

Feminstafélag Íslands hefur  gegnt miklu hlutverki í jafnréttisbaráttunni og á þakkir skyldir og ég ber mikla virðingu fyrir þeirra málstað, enda trúi ég að jafnrétti kynjanna sé samfélaginu mjög hollt.  Ég er samt sammála því að jafnréttisbaráttan snýst of  mikið um að þetta sé konur á móti körlum.  Ég upplifi þannig stundum framsetningu feminista að verið sé að fjalla um karlmenn sem vandamál og konur þurfa að kenna körlum að vera ekki það vandamál sem þeir eru.  

Bæði kynin þurfa að taka höndum saman til að jafnrétti kynjanna náist og þá verða bæði kynin að gera sér grein fyrir  að jafnrétti er gagnvirkur ferill og bæði kynin verða að geta litið í eigin barm til að við náum fram jafnrétti kynjanna í okkar samfélagi.