Til varnar Eskju.

Það var dapurt að horfa á þáttinn þar sem mjölmaður Eskju er í aðalhlutverkinu og á köflum í hálfgerðu trúðahlutverki.  Fréttamennirnir höfðu greinilega fyrirfram mótaða skoðun þegar þeir fóru að gera þennan þátt.  Skoðunin var sú að þeir telja að það sé ekki rétt að veiða uppsjávarfisk úr hafinu til þess eins að búa til eldislax eða eldisfisk.  Þegar blaðamenn hafa fyrirframgefna skoðun þegar þeir ráðast í verkefni þá verður niðurstaðan ávallt sú að þeir leita uppi efnistök sem styrkja þeirra skoðun.  Það var einnig í þessum þætti, þar sem mjölmaður Eskju ásamt erlendum vísindamönnum sem voru skoðanabræður blaðamanns voru notaðir til að styrkja þá skoðun að slæmt væri að veiða uppsjávarfisk til þess eins að búa til fiskafóður.  Svo var alþjóðadeilu um stjórn makrílveiða blandað inní þetta til að veikja málstað Eskju og Íslands. Allt þetta ætti að kenna hinum almenna íslending að ganga hægt um gleðinnar dyr þegar erlendir blaðamenn banka uppá og vilja flytja umheiminum fréttir á sínum forsendum. 

Til stuðnings Tryggva Þór Herbertssyni.

Þegar Ísland varð sjálfstætt ríki þá var aldursforseti Alþingis Norðfirðingurinn Ingvar Pálmason.  Hann stjórnaði ferföldu húrrahrópi á Þingvöllum þegar þingheimur fagnaði sjálfstæði Íslands þann 17.júní árið 1944.  

 

Ingvar Pálmason 

Æ síðan hafa Norðfirðingar átt fulltrúa á Alþingi Íslendinga og má þar nefna Lúðvík Jósepsson, Hjörleif Guttormsson og nú síðast Einar Már Sigurðsson.   Ingvar Gíslason, dóttur sonur Ingvars Pálmasonar var þingmaður og ráðherra.  Um þeirra fjölskyldu er fjallað á www.ekra.is  Aðrir Norðfirðingar hafa komið við á Alþingi í skemmri tíma.  Nú er ljóst að Einar Már fer ekki aftur á þing og eini möguleikinn til að Norðfirðingar muni eiga fulltrúa á þingi er að Tryggvi Þór Herbertsson hljóti brautargengi í prófkjöri Sjálfstæðismanna í Norð-Austur kjördæmi.

Það er full ástæða fyrir kjósendur í Norð Austur kjördæmi að veita Tryggva brautargengi í 2 sætið á lista Sjálfstæðisflokksins.  Kristjáns Júlíusson og hann yrðu glæsilegir leiðtogar í forystu fyrir flokkinn í NA kjördæminu.    Tryggvi hefur verið einn af okkar fremstu hagfræðingum á síðustu árum.  Tryggvi hefur sýnt Norðfirði margvíslegt vinahót og má nefna að hann og bræður hans gáfu eftir að faðir þeirra dó Norðfirðingafélaginu íbúð Herberts að Hafnarbraut 54 í Neskaupstað.  Félagið rak íbúðina í nokkur ár en var svo seld og eru fjármunir úr þeirri íbúð fjárhagsleg kjölfesta í starfsemi félagsins í dag.   Fyrir þessa gjöf er Norðfirðingafélagið (www.nordfirdingafelagid.is) ákaflega þakklátt Tryggva og bræðrum hans.

Tryggvi hefur komist það sem hann er á eigin forsendum og það er ekki ættarauður eða stórættartengslanet á bakvið hann.  Slíkan mann sem kemst áfram á eigin verðleikum þurufum við að fá á Alþingi Íslendinga og ég vona sannarlega að hann nái 2 sæti í prófkjörinu.  Læt svo fylgja með tvær myndir af Tryggva. Neðri myndin er fengin að láni af Fésbók Gunnars skólabróðirs Þorsteinssonar en hún er af Ingvari Jónssyni og Tryggva frá unglingsárunum þegar lífið var "deiligt".  Langafi Ingvars var Ingvar Pállmason.  Svo er efri myndin ný mynd af Tryggva.

 

Gott hjá Tryggva.

Það er vonandi að Sjálfstæðisfólk í Norð austurkjördæmi veiti Tryggva umboð til að vera í öðru sæti listans fyrir næstu kosningar. Þar er réttur maður á réttum stað á réttum tíma.

Tryggvi Þór: Greinir frá fjárhagslegum tengslum sínum

Pseudo - vísindi !

Það er kunnara en frá þurfi að segja að Háskóli Íslands hefur aldrei verið á meðal 100 bestu Háskóla í heimi.  Mér vitanlega hefur aldrei neinn vísindamaður úr Háskólanum komið til greina til útnefningar til Nóbelsverðlauna. Á sama tíma hefur Ísland skorað á top 10 í flestum einkunum um lífsgæði og annað og skorar ennþá hátt eftir bankahrunið, m.a. er ungbanadauði hvað lægstur hér á landi í öllum heiminum.  Það er því margt ef ekki flest annað  í okkar samfélagi sem skorar hærra á heimsvísu en okkar akademíska vísinda stofnun Háskóli Íslands.

Vísindamenn HÍ úr félagsvísindum virðast sumir meðvirkir með sinni pólitísku hugsjón.  Stefán Ólafsson er einn af þeim og flokkast sem andstæðingur Sjálfstæðisflokksins, sömuleiðis Þorvaldur Gylfason. Aðrir vísindamenn af sama meiði skrifa mikla skýrslu um fátækt og hún birtist rétt fyrir kosningar, útgáfuteiti er hjá forsetanum á Bessastöðum.  Þetta er auðvitað fyrir kosningar þegar Sjálfstæðisflokkurinn var við völd. Hannes Hólmsteinn er svo hinn póllin, meðvirkur með Sjálfstæðisflokknum í ræðu og riti.  Sameiginlegt með öllum þessum vísindamönnum er að þeir virðast ekki hafa sjónina á akademíska gagnrýna hugsun sem er forsenda fyrir framgangi vísinda.  Þetta eru ekkert annað en gervi (pseudo) vísindamenn.  Trúlega er þetta ein megin ástæðan fyrir því að Háskóli Íslands á mjög langt í lang með að vera á meðal bestu vísindaháskóla í heiminum.  Það eru of margir Pseudo vísindamenn starfandi við Háskóla Íslands.  Á meðan svo er þá verður svo að okkar kæri Háskóli Íslands á langt í að vera á meðal 100 bestu í heiminum.  Í þessu ljósi þá gef ég ekk neitt fyrir þessa samantekt Stefáns en þetta er hans pólitíska skoðun.

Hrunin frjálshyggjutilraun

Ályktun Bandaríkjanna byggð á vanþekkingu.

Það er dapurt að Bandaríkin sendi frá sér svona ályktun, þar sem þau lýsa áhyggjum yfir því að hvalstofnar við Ísland séu ekki nógu stórir til að þola veiðar.  Þetta bendir enn og aftur á þá staðreynd að kynning stjórnvalda og hagsmuna aðila á málsstað hvalveiða er í molum.   

Bandaríkin fordæma hvalveiðar

Nýjan forseta fyrir hið Nýja Ísland !

Í þeirri endurnýjun sem á sér stað á meðal forystumanna í samfélaginu þá getur forsetinn engan veginn verið undanskilinn.   Ólafur var virkur hluti af útrásinni með sumum af þeim víkingum sem nú eru hvað umdeildastir.   Það væri gott ef forsetinn myndi segja af sér þegar búið er að mynda nýja ríkisstjórn eftir Alþingis kosningarnar í vor.  Þá fengi ný ríkisstjórn starfsfrið þar sem þjóðin og fjölmiðlar yrðu uppteknir af forsetakosningum en ekki með smásjánna á nýrri ríkisstjórn.   Það er mikilvægt að ný ríkisstjórn, hver sem hún verður, fái starfsfrið.  Ólafur Ragnar Grímsson væri meiri maður ef hann myndi nú eftir Alþingiskosningar segja af sér og gefa þjóðinni kost á að velja sér nýjan forseta fyrir hið Nýja Ísland.  Annar hef ég skrifað um þetta áður.

Tæpur þriðjungur ánægður með forsetann

Á Íslandi mætti meintur faðir ekki fara í faðernismál!

Þetta mál er með ólíkindum á eiginlega allan hátt.   Það eru fleiri piltar sem virðast koma til greina sem faðir þessa litla barns.  Á Íslandi hefði enginn þessara drengja átt rétt á að fara í faðernismál en aðeins móðirin eða barnið seinna meir.

Sbr. Barnalög nr 76/2003

"10 gr. Stefnandi faðernismáls getur verið barnið sjálft, móðir þess eða maður sem telur sig föður barns, enda hafi barnið ekki verið feðrað, 

Forsenda fyrir því að karlmenn geti höfðað faðernismál er að barn sé ófeðrað.  Sorglegast í þessu er að þetta eru nýleg lög og voru samþykkt á hinu háa Alþingi.

 

Hver er pabbinn?

Eðlilegt að spyrja hver sé framtíðarleiðtogi Samfylkingar.

Það hlýtur að vera eðlilegt að flokksmenn Samfylkingar velti fyrir  sér hvort heppilegt sé að ISG leiði flokkinn í næstu kosningum.  Ingibjörg á sannarlega glæstan feril í borgarmálum, eftir að hafa leitt R-listann til  sigurs í 3 kosningum.  Á þeim tíma virtist enginn  eiga roð í hana í rökræðum og hún var öryggið uppmálað og eðlilegt að vinstri menn horfðu til hennar sem framtíðarleiðtoga.

Vistaskipti hennar yfir í landsmálin hafa þó verið frekar brösug.   Ég minnist þess að  eftirfarandi 3 ástæður hafa verið nefndar fyrir  stjórnarslitum við  Sjálfstæðisflokk.

a) Hlutirnir gengu of hægt undir forystu Geirs Haarde.  Staðreyndin er sú að flest frumvörp sem núverandi ríkisstjórn er að leggja fram urðu til  í fyrri ríkisstjórn en beið afgreiðslu hjá Samfylkingunni vegna veikinda ISG.  Hlutirnir gengu því hægt vegna þess að Samfylkingin var ekki í stakk búinn til að afgreiða mál í fjarveru ISG.

b) Sjálfstæðisflokkur verður að breyta um Evrópustefnu.  Staðreyndin er sú að Sjálfstæðisflokkurinn var og er á fullu í naflaskoðun um Evrópumálin.  Ekki er hægt að sjá að neitt sambærilegt sé í gangi hjá VG.  Þannig  treystir Samfylkingin sér að vinna með flokki sem er mest á móti umsókn Íslands í EU.  

c) Samfylkingin vildi forsætisráðuneytið.  Staðreyndin var sú að eftir að ljóst var að Geir Haarde og Ingibjörg Sólrún voru veik, þá myndi Þorgerður Katrín verða forsætisráðherra, fyrst íslenskra kvenna.  Þetta gat ISG & Co ekki hugsað sér.  Það varð því úr að mynda nýja stjórn með Jóhönnu sem forsætisráðherra. 

Það að ISG segi að Samfylking  hafi axlað ábyrgð með því að mynda nýja stjórn stenst því alls ekki nánari skoðun, heldur voru búnar til ástæður til að slíta samstarfinu og flokkur hennar var ekki í takt á meðan hún var á sjúkrahúsi og ástæður fyrir stjórnarslitunum voru ódýrar og Samfylkingunni ekki til  sóma.

Það má því færa efnisleg rök fyrir því að ISG geti ekki verið hluti af hinu nýja Íslandi, frekar en Davíð Oddsson, Ólafur Ragnar Grímsson, bankastjórar gömlu bankanna nú eða Geir Hilmar Haarde.   til þess er einnig hún of innvinkluð í margt í gamla kerfinu.   Krafan um nýtt fólk fyrir hið nýja Ísland nær einnig til  hennar.

Ekki bætir það að ISG tók þátt  í einni  mestu vitleysu i utanríkismálum þegar hundruðum milljóna af  skattfé landsmanna var kastað á eldinn með framboði til Öryggisráðs Sameinuðuþjóðanna.   Ríkissjóður hefði núna full not fyrir þessa fjármuni í þarfari hluti.

Hvorki Jón Baldvin eða Jóhanna eru framtíðarleiðtogi fyrir Samfylkinguna, einfaldlega vegna þess að þeirra  tími er liðinn eða að líða.  Framtíðarverkefni  þeirra beggja er að njóta eftirlaunaáranna en ekki vera í fremstu röð íslenskra stjórnmála.  Mikilvægasta hlutverk ISG hlýtur að vera að ná fyrri heilsu og hún getur ekki verið hluti af hinu Nýja Íslandi.  Þegar allt þetta er lagt saman þá er deginum ljósara að eðlilegt er að spyrja hver verður framtíðarleiðtogi Samfylkingar ?

 

Ingibjörg Sólrún ekki að hætta

Hið nýja Ísland þarf nýjan forseta.

Krafa samtímans er að athafna- og stjórnmálamenn geri upp fortíð sína og tengls sín við bankahrunið.  Hið nýja Ísland skal byggja á forystu sem hvorki tengist eða ber ábyrgð á bankahruninu.

Það er því ljóst að það verður uppstokkun í landsmálum og í bankakerfinu sem einnig getur haft afleiðingar útí atvinnulífið þar sem bankarnir eiga ríka hagsmuni að gæta.

Forseti Íslands, Ólafur Ragnar Grímsson studdi og dásamaði útrásarvíkingana í ræðu og í riti.  Menn í viðskiptum á erlendri grundu með Forseta Íslands í sínu fylgdarliði þóttu trúverðugir og fengu ríka fyrirgreiðslur.  Hluti af þeim fjármunum er nú að falla á þjóðina.   Sterk tengsl forsetans við ákveðnar viðskiptablokkir er staðreynd.  Þessir sömu aðilar eiga ráðandi hlut í stærstu fjölmiðlum landsins. Síðasta ríkisstjórn Davíð Oddssonar vildi setja leikreglur til að tryggja dreift eignarhald á fjölmiðlum. Það hugnaðist Ólafi ekki sem neitaði að undirrita fjölmiðlalögin.  Þannig tryggði hann óbreytt eignarhald á fjölmiðlum.  Davíð hefur verið í kastljósi fjölmiðlanna en Ólafur Ragnar ekki á sama hátt, þó það sé efnisleg ástæða fyrir gagnrýnni umfjöllun um þátt hans í útrásinni.    

Ólafur Ragnar hefur verið öðruvísi forseti en forverar hans.  Á margan hátt hef ég kunnað ágætlega við margt sem hann hefur sagt og gert.  Hann hefur engu að síður verið pólitískari og virkur þáttakandi í útrásinni. Þannig er hann ekki eins hlutlaus og fyrirrennarar hans voru.  

Ólafur Ragnar Grímsson getur í mínum huga ekki verið hluti af hinu nýja endurreista Íslandi.   Til þess hefur hann setið of lengi og verið of virkur þáttakandi í útrásinni, sem nú virðist á góðri leið með að setja íslensku þjóðina í alvarlega skuldaklemmu.  Við þurfum því nýjan forseta á Bessastaði sem hvorki tengist eða ber ábyrgð á bankahruninu.  Slíkur forseti verður hluti af hinu nýja Íslandi.

Jakob Björnsson með flotta grein í Morgunblaðinu í dag.

Jakob Björnsson hefur verið iðinn  á síðustu árum við að skrifa um orkufrekan iðnað og kosti hans.   Þegar bylgja mótmæla reis sem hæst á móti Kárahnjúkavirkjun og uppbyggingu atvinnuvega á Austurlandi þá stóð hann eins og klettur í hafinu og var ætíð með efnisleg rök fyrir því að eðlilegt er að við nýtum hina hreinu orku sem felst í fallvötnunum okkar.   Þannig  hefur hann ávallt verið ötull talsmaður skynsamlegrar uppbyggingar í orkumálum.

Í dag skrifar hann svo í Morgunblaðið grein sem ber heitið: "EKKI EÐA HELDUR OG".  Þar bendir hann á þá staðreynd að uppbygging í orkufrekum iðnaði  útilokar ekki uppbyggingu á þekkingariðnaði.  Hann segir m.a.

"Fyrir okkur Íslendinga er ekki um að ræða val milli orkufreks iðnaðar og annarra atvinnuvega. Við þurfum á hvorutveggja að halda og höfum menntunarforsendur til að nýta okkur hvorttveggja."

Orði í tíma töluð, eins og annað sem kemur frá hinum aldna fyrrverandi Orkumálastjóra.

Annað sambærilegt mál þar  sem að tveimur atvinnugreinum er stillt upp sem andstæðum, eru hvalveiðar og ferðamannaiðnaður.  Það mætti yfirfæra ofangreinda fullyrðingu Jakobs yfir á hvalveiðar og ferðamannaiðnað.

"Fyrir okkur Íslendinga er ekki um að ræða val milli hvalveiða og ferðamannaiðnaðar. Við þurfum á hvorutveggja að halda og höfum menntunarforsendur til að nýta okkur hvorttveggja."

 Það væri betur ef svona einföld rökrétt hugsun yrði ríkjandi hér á landi og viðurkennt að við þurfum fjölbreytta flóru atvinnuvega, virkjanir, álver, hvalveiðar og ferðmannaiðnaður er hluti af því.